Samdir um at fáa øll úr Afganistan

Amerikanski forsetin, Joe Biden, og bretski forsætisráðharrin, Boris Johnson, eru samdir um at arbeiða fyri at tryggja, at øll, sum skulu flytast burtur úr Afganistan, verða flutt. Eisini, um evstamarkið 31. august skal verða longt. 

Tað boðar Downing Street nummar 10 frá. Ovastu leiðararnir í londunum báðum tosaðu saman í gjárkvøldið.

Taliban boðaði annars frá í gjár, at tað fær álvarsligar avleiðingar, um USA og tey sameindu leingja freistina til eftir 31. august, at tey fara hava herfólk í landinum.

Í dag fara Joe Biden og Boris Johnson á G7-fund á netinum. Talan er um ein eykafund, har støðan í Afganistan skal umrøðast.