B36 heitir á FSF um at útseta síðsta leikumfar

B36-spælarin, sum í gjár fekk staðfest koronu, hevur ikki smittað nakran annan spælara í B36-hópinum. 

Hetta skrivar B36 á sínari Facebook-síðu. 

Dysturin hjá B36 móti Víkingi var útsettur í gjár, tí ein B36-spælari fekk staðfest koronu beint fyri dystarbyrjan. 

Allir hinir spælararnir, og fólk kring hópin, blivu alt fyri eitt kannað fyri koronu, tí smittaði spælarin hevur vant við liðnum dagarnar upp undir dystin. 

Kanningarnar hava nú staðfest, at eingin annar B36-spælari er smittaður. 

Men av tí, at seks spælarar í B36-hópinum ikki eru koppsettir, skulu hesir sita 10 dagar í sóttarhaldi, og tað sóttarhaldið gongur út hósdagin, 4. november. 

B36 hevur tí heitt á FSF um at útseta seinastu landskappingardystirnar, til hesir seks spælararnir aftur eru tøkir.