Óvissa um fiskidagar krevur rætting

Talið á fiskidøgum fyri 2022 vóru kunngjørd fyrr í mánaðinum, men nú boðar Vørn frá, at fiskiloyvini hjá bólki 3 og 4, sum eru línuskipini og útróðrarbátarnir, ikki eru endalig og fara at vera broytt.

Vørn skrivar, at tað er munur á útrokningargrundarlagnum í kunngerð um fiskidagar í føroyskum sjógvi í 2022 og talið hjá Vørn. Tí er neyðugt at endurskoða tølini og lýsa tey av nýggjum.

Øll, sum hava rætt til fiskidagar í føroyskum sjógvi í 2022 og hava sent umsókn um at fáa hesar útskrivaðar, fara at fáa loyvi so skjótt sum tilber.

Vørn skrivar, at loyvið skal metast sum fyribils og verður helst rættað seinni.

Fimm prosent
Skip og bátar, sum fiska við línu, snellu og troli á landleiðini, fáa annars fimm prosent færri dagar næsta ár enn í ár. 

Lemma- og partrolarar fáa fimm prosent fleiri dagar. 

Trolarar, línuskip, stórir útróðrarbátar og trolbátar fáa eyka fiskidagar fyri at avreiða livur og annan innvøl úr fiski til virki í Føroyum.