Hava gjørt trý ára sáttmála

Pengar

Starvsfelagið, Lønardeildin hjá Fíggjarmálaráðnum og KAF hava skrivað undir nýggjan sáttmála

Súni Selfoss, formaður í Starvsfelagnum, og Jørgen Niclasen, landsstýrismaður í fíggjarmálum

Mynd: Bjarni Árting Rubeksen

Uni L. Hansen

13.01.2022 - 13:23

Tað bleiv semja.

Tað gjørdist greitt fyri løtu síðani, tá Starvsfelagið og Lønardeildin hjá Fíggjarmálaráðnum og kommunala arbeiðsgevarafelagnum skrivaðu undir semingsuppskotið frá semingsstovninum.

Semingsstovnurin legði semingsuppskotið fyri partarnar í gjár.

Sáttmálin

Talan er um ein trý ára sáttmála, galdandi frá 1. oktober 2021 til 1. oktober 2024.

Semjan inniber, at lønirnar hækka soleiðis:

Tann 1. januar 2022 hækka lønirnar við 1,25 %.
Tann 1. oktober 2022 hækka lønirnar á lønarstigunum 1-20 við 740 krónum og á lønarstigunum 20-50 við 540 krónum.
Tann 1. oktober 2023 hækka lønirnar við 2,75 %.
Hetta svarar til ein samlaðan lønarkarm á 6,2 % yvir 3 ára skeiðið.

Umframt lønarbroytingarnar eru ymisar broytingar gjørdar í sáttmálunum millum ávikavist Fíggjarmálaráðið og Starvsfelagið og Kommunala Arbeiðsgevararfelagið og Starvsfelagið.

SÁTTMÁLIN SÆST HER.