Nýggjur aðalskrivari í Amnesty

Turið Maria Jóhansdóttir er nýggjur aðalskrivari hjá Amnesty International Føroyum.

Turið Maria er 35 ára gomul og er útbúgvin í samfelagsvísindum.

12 umsóknir komu til starvið sum aðalskrivari hjá Amnesty International Føroyum. 

Ein samdur setanarbólkur mælti nevndini hjá Amnesty til at seta Turið Mariu i starv.

Turið Maria Jóhansdóttir tekur við starvinum 1.februar.

Katrin á Neystabø var aðalskrivari í Amnesty, men hon fór í starv hjá ÍSF 1.september í fjør.

Hoyr samrøðu við Turið Mariu Jóhansdóttir her:

Sambært formanninum í nevndini hjá Amnesty International Føroyum, Regini Berg, var setanargongdin  seinkað, tí tá fólk, ið nýliga hava verið virkin í Amnesty, søkja  starv í felagsskapinum,  skal tað góðkennast av altjóða leiðsluni. Hetta verður gjørt fyri at tryggja sær, at alt er farið rætt fram, og at viðkomandi veruliga hevur best skikkaðu umsóknina.

Jólafrítíðin gjørdi, at gongdin varð longur enn vant.

Regin Berg leggur aftrat, at fyri at tryggja, at alt fór rætt fram í setanargongdini, var ein uttanhýsis ráðgevi settur at standa fyri setanartilgongdini, og aðalskrivarin í Amnesty Danmark var við í setanarbólkinum.