Landsstýrismaðurin: Broytingar verða gjørdar í samferðslupakkanum

Broytingar verða gjørdar í samferðslupakkanum, nú hann fer til fyrstu viðgerð í tinginum í dag.

Tað sigur Jørgen Niclasen, landsstýrismaður í fíggjarmálum, sum eigur uppskotið.

Hann veit tó ikki enn, hvørjar broytingar verða gjørdar.

Týsdagin segði Erhard Joensen, formaður í fíggjarnevndini - sum eftir viðgerðina í dag fær uppskotið á sítt borð - at hann møguliga fer at biðja landsstýrismannin gera broytingar, so fíggjarnevndararbeiðið ikki verður til fánýtis.

Erhard Joensen

Erhard Joensen, formaður í fíggjarnevndini.

Men landsstýrismaðurin í fíggjarmálum kastar bóltin aftur til Erhard Joensen og restina av løgtinginum, tí nú skulu tey sleppa at viðgera tað fyrst, sigur Jørgen Niclasen.

Jørgen Niclasen, landsstýrismaður í fíggjar- og samferðslumálum, hevur skotið upp at hækka avgjaldið á bensini, dieselolju og tungolju. Hann hevur eisini skotið upp at hækka vegskattin og farmagjøldini hjá Strandferðsluni.

Hetta skal vera við til at fíggja bíligari tunnilsgjøld í Eysturoyartunnlinum, avtøkuna av  tunnilsgjøldunum í Norðoya- og Vágatunlunum umframt keypið og raksturin av einari avloysaraferju á suðuroyarleiðini.