Samuel til belgiska oddaliðið

HB-spælarin, Samuel Johansen Chukwudi, skal til belgiska oddaliðið, Royal Union Saint-Gilloise. Tað skrivar hb.fo.

Í fyrsta umfari skal 18 ára gamli verjuspælarin fáa viðgerð og endurvenjing fyri skaða, sum hevur darvað í langa tíð, og um tað gongur eftir vild, verður sáttmáli undirskrivaður í summar.

 - Alt tað eg kann minnast, havi eg havt ein dreym um at gerast yrkisleikari. Dreymurin hevur altíð verið at spælt í eini av fimm bestu deildunum í Evropa, og hetta kann gerast eitt stig á leiðini. Men fyrst og fremst snýr tað seg um at koma fyri meg, sigur Samuel Johansen Chukwudi við heimasíðuna hjá HB.

Royal Union Saint-Gilloise er í løtuni oddalið í bestu belgisku deildini frammanfyri lið sum Club Brugge og Anderlecht, og nógv bendir á, at felagið fer at vinna meistaraheitið í ár eftir uppflytingina í fjør. Ger felagið tað, verður tað 12. meistaraheitið. Tað er kortini langt síðan seinast; síðst steypið kom til høldar var í 1935.

 - Vit harmast um at missa ein av okkara evnaríkastu spælarum, men fegnast sjálvsagt um, at Samuel fær hendan møguleikan, og at vit harvið senda enn ein leikara víðari í karrieruni, skrivar HB.