Gullregn á Frælsinum

Gullið regnaði niður á føroysku rógvararnar, sum kappaðust um danmarksmeistaraheitið í inniróðri um vikuskifti.

18 rógvarar vóru við í tilsamans 22 kappingum og vunnu 10 gull-, átta silvur- og fýra bronsuheiðursmerki.

17 ára gamli Mattias Durhuus vísti sínar gávur á rógvimaskinuni, tá hann fór avstað við danska meistaraheitinum á bæði 200 og 2000 metra teinunum.

 - Eg havði ikki væntað hetta á 2000 metrum. Eg vónaði at fáa medalju, men hevði ikki væntað fyrsta plássið. Á 200 metrum satsaði eg bara upp á tað besta, segði ungi rógvarin úr Hósvíkar Róðrarfelag.

Zoe Dickson úr Kollafjarðar Róðrarfelag og Vár Guriardóttir Hansen úr Argja Róðrarfelag høvdu eisini góðar kappingar uppundir HM í inniróðri, sum verður seinni í mánaðinum.