USA og ES tryggja Evropa nóg mikið av gassi

Skuldi tað hent, at Russland fer at steingja fyri gassveitingini til Ukraina og Evropa, sum eina fylgju av ósemuni um Ukraina, so fara USA og ES at tryggja evropearum og fólkinum í Ukraina nóg mikið av gassi.

- Vit arbeiða við at tryggja Evropa gass, um tað ringasta skuldi hent, segði amerikanski uttanríkisráðharrin, Antony Blinken, tá hann í gjár hitti uttanríkisráðharran í ES, Josep Borrell, í Washington, skrivar Ritzau.

Partarnir siga seg stúra fyri, at Russland fer at steingja gassveitingina til Evropa,um landið ger innrás í Ukraina.

- Tað kann gerast enn ein harðrend framferð ímóti fólkinum í Ukraina, sigur amerikanski uttanríkisráðharrin.

Avtalan um russiskt gass til Evropa er komin undir trýst, tí Russland letur ikki so nógv gass, sum ætlaniun hevur verið, og tað hevur havt við sær, at prísurin á gassi er nógv hækkaður.

Nord Stream 2 stongd

Samstundis boða amerikanski forsetin, Joe Biden og týski samveldiskanslarin, Olaf Scholz frá, at gassleiðingin, Nord Stream 2, verður stongd, um Russland loypur á Ukraina. Tað gjørdu teir á tíðindafundi í Washington.

Gassleiðingin Nord Stream, sum liggur úr Russlandi til Norðurtýsklands, er júst liðug, men enn er loyvi ikki givið at leiða gass ígjøgnum leiðingina.

Týski samveldiskanslarin ávaraði á tíðindafundinum Russland, og segði tað fáa álvarsligar avleiðingar, um russiskir hermenn taka seg inn í Ukraina.