![](https://kvf.fo/sites/default/files/styles/myndasavn-width/public/vlcsnap-2021-10-04-14h29m07s685.png?itok=QhqOTdmU)
- Tíðindi, mentan og ítróttur
Einar's Whisky verður børsað á Facebook
![](https://kvf.fo/sites/default/files/styles/grein-ovasta-mynd/public/einars_0.jpg?itok=AQb5ra2K)
Einar's Single Malt Whisky, sum Føroya Bjór framleiðir, verður selt í hópatali á ymiskum sølupallum á Facebook.
Oftani fara fløskur fyri fleiri ferðir keypsprísin í Rúsuni.
Onkur deild hjá Rúsdrekkasølu Landsins hevur illgruna um, at fólk keypa Einars Whisky inn undir seg um morgunin, og børsa so við teimum um kvøldið.
10.000 krónur
Í einum søluuppslagi á Facebook eru fýra fløskur av Einar's whisky settar til sølu, um hóskandi boð fæst.
Higartil hevur onkur bjóðað 10.000 krónur.
Hvørja ferð eitt nýtt batch, sum er eitt framleiðslurað, av Einar's Whisky fer til sølu, er ein bíðirøð uttan fyri Rúsurnar kring landið eina góða løtu, áðrenn Rúsdrekkasølan letur upp.
Og fleiri keypa nógvar fløskur.
Rúsdrekkasøla Landsins hevur kannað møguleikan fyri at avmarka søluna av ávísum slagi av whisky, men higartil hevur ikki borið til.
Rógvi Fossdalsá, stjóri í Rúsdrekkasølu landsins hevði ongar viðmerkingar til málið í løtuni.
Einar mælir til avmarkingar
Einar Waag, stjóri á Føroya Bjór, hevur vent sær til Rúsdrekkasølu Landsins við einari áheitan um at seta avmarkingar á søluni av hansara whisky.
Føroya Bjór framleiðir whisky í so smáum nøgdum enn og vil tí gjarna hava, at so nógv sleppa at keypa fløskurnar.
Ólógligt at selja rúsdrekka á Facebook
Tað er ikki lógligt hjá einstaklingum at selja rúsdrekka umvegis Facebook ella nakra aðrastaðnis.
Rúsdrekkasølan, matstøð og vertshús kunnu selja rúsdrekka, men ikki einstaklingar á Facebook.
Michael Boolsen, fúti, veit ikki at siga, um nakar hevur meldað privatu søluna av rúsdrekka á Facebook.
Hann vísir til Umhvørvis- og vinnumálaráðið, sum varðar av lógini.