Moody´s ger regluligar metingar fyri BankNordik

Kredittmetingarfyritøkan Moody’s ger nú regluligar metingar fyri BankNordik. 

Fyrsta metingin frá Moody’s er A2, sum er ein góð meting við lágum váða og góðum útlitum, sigur BankNordik. 

A2 er sætta besta metingarstigið hjá Moody´s. Moody´s hevur 19 metingarstig. Metingin var kunngjørd í gjár. 

Hevur týdning fyri íleggjarar

BankNordik sigur, at nógvir stórir íleggjarar, til dømis pensjónsfeløg, gera bara íløgur í fyritøkur, sum hava kredittmeting.

Tí kann metingin frá Moody’s vera við til at draga fleiri íleggjarar til BankNordik. 

Harumframt gevur kredittmetingin BankNordik møguleika fyri at fáa betri treytir, tá bankin skal taka lán ella útgeva lánsbrøv.