Stjórin í sponsku fregnartænastuni koyrd frá

Stjórin fyri sponsku fregnartænastuna er søgd úr starvi eftir boðum frá sponsku stjórnini. 

Orsøkin er, at spanska fregnartænastan hevur avlurtað fartelefonir hjá katalonskum politikarum.

Fleiri spanskir miðlar skriva í daga, at Paz Esteban López, er koyrd úr starvi, og verjumálaráðharrin, Margatrita Robles, hevur váttað tíðindini.

Í síðstu viku viðgekk Esteban López, at fregnartænastan við loyvi frá rættarmyndugleikum hevði sníkt seg inn á telefonirnar hjá fleiri katalonskum loysingarfólkum. 

Stórt trýst hevur verið á sponsku fregnartænastuna, tí telefonirnar hjá sosialdemokratiska forsætisráðharranum, Pedro Sánchez, og hjá verjumálaráðharranum, Margarita Robles, eru hakkaðar við njósnaratøknini Pegasus. 

Nógvar dátur eru stolnar úr telefonini hjá forsætisráðharranum, sigur stjórnin.