Fíggjareftirlitið hartar banka

Peningastovnar kunnu ikki, uttan sakliga grundgeving, nokta fólki at stovna eina vanliga innlánskontu.

- Og tað er ikki ein saklig grundgeving, at fólk ikki vilja siga bankanum, hvussu nógv, tey skylda.

Tað sigur Fíggjareftirlitið, sum hevur viðgjørt eina klagu.

Arbejdernes Landsbank
Arbejdernes Landsbank noktaði at stovna eina innlánskontu, tí bankin fekk ikki upplýsingar um skuldina hjá tí, sum vildi hava kontuna.

Bankin kravdi upplýsingarnar við at vísa til lógina, sum skal forða fyri, at pengar verða hvítvaskaðir í bankanum.

Men Fíggjareftirlitið sigur, at bankanum nýtist ikki at vita, hvørja skuld, fólk hava, vilja tey stovna innlánskontu, heldur ikki, um víst verður til lógina um at hvítvaska pengar.

Ósømiligur atburður
Fíggjareftirlitið sigur, at ein saklig grund fyri at nokta fólki at stovna innlánskontu, kann vera, at fólk hava borið seg ósømiliga at í bankanum.

Arbejdernes Landsbank hevur fingið boð um at broyta sínar mannagongdir viðvíkjandi spurningum til teirra, sum vilja stovna innlánskontu.

Danska Fíggjareftirlitið hevur eisini eftirlit við peningastovnunum í Føroyum.