Skulu finna aðrar marknaðir fyri eina milliard og 150 milliónir

Var handilsstongsulin, sum ES fyrireikar ímóti Føroyum, galdandi í fjør, hevði føroyska uppsjóvarvinnan verið noydd til at finna aðrar marknaðir fyri sild og makrel fyri eina milliard og góðar 150 milliónir krónur

savnsmynd

Uni Holm Johannesen

Høgni Djurhuus

25.07.2013 - 08:08

Tað er virðið á føroysku sildini og føroyska makrelinum, sum fóru til ES í fjør. Av hesum er fiskur fyri yvir 600 milliónir krónur, sum fer gjøgnum ES til onnur lond, millum annað lond í Afrika.

Tølini hevur danska stjórnin frá Hagstovuni í Føroyum.

Danska matvørumálaráðið kunnaði í gjár Evropanevndina hjá fólkatinginum um komandi handilsstongsulin móti Føroyum.

Meiriluti fyri tiltøkunum

ES-nevndin fyri fiskivinnu og aling fer mikudagin í næstu viku at samtykkja at revsa Føroyar fyri sildakvotuna í ár.

Tað hendir, hóast Danmark fer at atkvøða ímóti, tí, sum Evropanevndin fekk at vita í gjár, Danmark hugsar um ríkisfelagsskapin.

Danska stjórnin tekur undir við landsstýrinum, sum hevur nevnt møguleikan at brúka semingsmøguleikan í altjóða havrættarsáttmálanum hjá ST.

Danska stjórnin veit, at millum annað Bretland, Írland, Spania og Frakland fara at atkvøða fyri tiltøkunum móti Føroyum.

Og við at spyrja sendistovurnar hjá Danmark í ES-londunum og við at lesa fundarfrásagnir frá fundum hjá ES-ráðnum um fiskivinnu, væntar stjórnin, at neyðugi meiriluti verður fyri revsitiltøkunum móti Føroyum.

Uppskotið verður samtykt, hóast Danmark atkvøður ímóti, er niðurstøðan hjá stjórnini.

Í fjør landaðu føroysk skip bara 262 tons av sild og ongan makrel í Danmark.

Landsstýrisfundir í dag

Enn hevur landsstýrið ikki boðað frá, hvussu landsstýrið ætlar at verja Føroyar móti revsingini hjá ES.

Men Annika Olsen, varaløgmaður, ætlar at leggja málið fyri landsstýrið, sum hevur fund í dag.

Annika Olsen skrivaði á Facebook í gjárkvøldið, at "sum virkandi løgmaður fari eg á landsstýrisfundi í morgin at taka upp álvarsliga málið um ES revsiátakið mótvegis Føroyum.

Tað er umráðandi, at samlaða landsstýrið fær høvi at umrøða hvørjir kostir eru í at velja, og hvussu vit fáa Føroyar best burturúr hesi størstu politisku avbjóðing í nýggjari tíð," skrivar Annika Olsen.