Umhugsa standmynd í Fámjin

Í Fámjin, har tey í kirkjuni hava fyrsta føroyska flaggið hangandi og gravsteinin hjá Jens Oliver Lisberg standandi í kirkjugarðinum, ætla tey nú eisini at reisa honum eina standmynd.

Tað er í sambandi við, at Fámjins kommuna ætlar at fylla mold í gamla kirkjugarðin við kirkjuna, at tankin um eina standmynd av Jens Oliver er kveiktur.

Jóannes Lisberg, borgarstjóri, sigur við in.fo, at kirkjugarðurin er gamal og ringur at halda, og tí umhugsa tey at lata gravsteinarnir verða standandi, men at restin av kirkjugarðinum skal verða mold og flag.

Helst verður talan um eina bringumynd av Jens Oliver, ið kemur at standa niðan fyri kirkjuna, men einki er avgjørt, tí hetta er alt samalt enn bara ein ætlan.

- Jens Oliver Lisberg er helst kendasti persónur, sum fámjiningar eiga, heldur borgarstjórin.

Tað var í apríl mánaði í 1919, at Jens Oliver Lisberg saman við Janusi Øssursson úr Havn og Paula Dahl úr Vági teknaði uppskotið til Merkið, ið varð viðurkent sum føroyskt flagg tann 25. apríl í 1940.