Bretland: Tey ríkastu fáa ikki skattalætta kortini

Bretski fíggjarmálaráðharrin, Kwasi Kwarteng, sigur, at stjórnin broytir ætlanirnar um skattalætta til nøkur av teimum ríkastu í landinum. 

23. september kunngjørdu bretski forsætisráðharrin, Liz Truss, og Kwasi Kwarteng, fíggjarmálaráðharri, nýggja vakstrarætlan, har tey m.a. ætlaðu, at skatturin hjá teimum, sum forvinna meira enn 150.000 pund um árið - tað eru meira enn 1,2 milliónir krónur, skal minka úr 45 niður í 40 prosent.

Á Twitter skrivar fíggjarmálaráðharrin nú, at tað er vorðið greitt, at skattalættin til tey ríkastu hevði órógvað ætlanir teirra at loysa búskaparligu avbjóðingarnar í Bretlandi, og at tey tí ikki arbeiða víðari við hesum skattalættanum.

- Vit skilja tað, og vit hava lurtað eftir. Hetta ger, at vit kunnu arbeiða málrættað við stóru pørtunum í okkara vakstrarpakka, skrivar Kwasi Kwarteng, fíggjarmálaráðharri, á Twitter.