Hava ikki tikið allan fugl av

Allur fuglurin, sum heldur til á trøðni í Havnadali, har fuglakrím varð staðfest fyri einari viku síðani, er ikki tikin av enn.

Lars Mohr Nielsen, djóralækni á Heilsufrøðuligu starvsstovuni, sigur, at økið er tryggjað so væl, sum til ber undir verandi umstøðum.

Hetta merkir millum annað, at allur fuglurin nú er avbyrgdur, antin undir taki ella stikaður inni.

Spurdur, hví allur fuglurin á økinum ikki er dripin, sum annars er vanligt, tá fuglakrím verður staðfest í einum ávísum øki, sigur Lars Mohr Nielsen, at eigarin av økinum hevur ávísar kærumøguleikar, og at hesir møguleikar kunnu troytast, áðrenn Heilsfrøðiliga starvsstovan kann koma við nøkrum kravboðum.

Lars Mohr Nielsen - Mynd: Djóralæknatænastan

Lars Mohr Nielsen, djóralækni. (Mynd: Djóralæknatænastan á Facebook)

Hønur, gæs, dunnur og dúgvur

Á trøðni við Havnará skamt vestan fyri nýggju brúnna út á Argir, hevur eigarin havt hønur, gæs, dunnur og dúgvur. Tað vóru serliga hønurnar, sum vórðu raktar av fuglakrími. 23 av 25 hønum lógu brádliga deyðar. Tær báðar í flokkinum, ið vóru á lívi, blivu síðani dripnar. Eisini doyðu tríggjar gæs.

Allur hin fuglurin á økinum er enn á lívi.

Samanborið við annan fugl á trøðni, so flúgva dúgvurnar, og Lars Mohr Nielsen útilokar ikki, at tær kunnu vera komnar við smittuni. Tað er tó meira sannlíkt, at tað er villur fuglur, eitt nú grágás, sum hevur sett seg eina løtu, og hevur smittað við skarninum, sigur hann.