Løgreglan: Einki bendir á nakað revsivert

Eingin orsøk er at halda, at nakað revsivert fór fram, tá ein kvinna úr Kina hvarv, tá hon saman við manninum, var gonguferð við Trælanípuna fríggjadagin

Í øllum førum eru eingi tekin um tað, sigur Heri Andreasen, leiðari á kanningardeildini hjá løgregluni.

Kvinnan varð gift við einum manni úr Hollandi, og tey búðu í Týsklandi. Maðurin er føddur í 1969, og kvinnan var fødd í 1986. Tey høvdu livað saman í mong ár.

Samskifta við familjuna í Kina

Leitingin á sjógvi og landi er hildin uppat, men kortini kannar løgreglan framvegis málið, í vón um at fáa greiði á tí sum fór fram. M.a. er samskifti við familjuna hjá kvinnuni í Kina.

Maðurin er avhoyrdur, og fólk, sum hann hevur víst á sum møgulig vitni, eru eisini avhoyrd.

Maðurin er framvegis í Føroyum, og hann hjálpir til við at fáa greiði á málinum.