Marine Harvest: Føroyski parturin meiri burturúr

Føroyskir alarar fáa meiri burtur úr enn teir norsku. Hetta var enn einaferð staðfest, tá norska alifyritøkan Marine Harvest í gjár kunngjørdi sín hálvársroknskap.

Uppgerðin hjá heimsins størstu alifyritøku vísir, at føroyski parturin av fyritøkuni hevði bestu úrtøkuna.

16 krónur kilo

Annan ársfjórðing fekk Marine Hervest Faroes 16,41 norskar krónur fyri hvørt kilo av aldum laksi. Hetta er næstan tvær krónur meira fyri kilo enn tann parturin av alifyritøkuni, sum hevði næst bestu úrtøku, nevniliga Kanada, ið fekk 14,55 norskar krónur fyri kilo.

Í norska partinum av Marine Harvest var úrslitið millum 7,94 og 14,37 krónur fyri kilo, alt eftir hvar í landinum fiskurin er framleiddur.

Besta ársfjórðingsúrslitið

Marine Harvest samtakið legði í gjár fram besta ársfjórðings-úrslitið nakrantíð. 79.438 tons vórðu tikiðð, og úrslitið 627 milliónir norskar krónur.