Rokniamboð skal hjálpa fyritøkum at minka CO2-útlátið

Umhvørvisstovan og stovnandi limirnir í Burðardyggum Vinnulívi hava skipað samstarv um at gera tað lættari hjá fyritøkum í Føroyum at seta sær mál og minka um sítt CO2-útlát.

Tær tólv stovnandi fyritøkurnar eru: Bakkafrost, Betri Banki, Effo, Faroe Ship, Føroya Tele, Gist og Vist, JT Electric, KJ Hydraulik, MBM, P/F Poul Michelsen, SMJ og Vónin.

Johannes Jensen er nevndarformaður í Burðardyggum Vinnulívi.

Í desember er ætlanin at geva út eitt CO2-rokniamboð, sum verður tøkt á heimasíðuni hjá Umhørvisstovuni. Rokniamboðið verður ókeypis og frítt hjá øllum at brúka.

Endamálið við CO2-rokniamboðnum er at hjálpa fyritøkum við at rokna út og síðani minka sítt CO2-útlát.

Hetta verður gjørt fyri at ganga vísindaligum metingum á møti um at minka CO2-útlátið niður í helvt í 2030.