Friðarútlit í Venesuela

Stjórnin og andstøðan í Venesuela hava undirskrivað eina avtalu í Meksiko, sum skal leiða landið út úr politisku kreppuni, sum landið hevur verið í líka síðan 2018, tá Nicolás Maduro vann forsetavalið eftir ákærur um umfatandi valsvik.

Tá var landið longu í kreppu, men í 2018 vóru enn fleiri tiltøk sett í verk móti Venesuela. Millum annað vóru milliardir av dollarum frystir í útlendskum peningastovnum. Amerikanska oljufelagið Chevron fekk eisini bann at virka í landinum, og tað hevði eisini umfatandi avleiðingar við sær, tí Venesuela ikki slapp av við oljuna, sum landið er so ríkt av.

Norra hevur verið virkin partur í at finna semju millum stjórn og andstøðu. Ein partur av semjuni er, at nakrar av fastfrystu milliardunum kunnu latast sosialum endamálum í Venesuela, har korini hjá fólkinum eru sera trong. Inflatiónin er høg, mangul er upp á heilivág, og streymurin verður slitin við jøvnum millumbilum.

Nógvir trupulleikar eru eftir at loysa. Millum annað vil Nicolás Madura hava viðurkenning frá amerikansku stjórnini, sum annars hevur viðurkent andstøðuleiðaran, Juan Guaido, sum landsins forseta.