H71-kvinnurnar hava enn kjans

Kvinnurnar hjá H71 taptu í gjárkvøldið í høllini á Hálsi í Havn fyrra EHF Europa Cup-dystin ímóti tjekkiska Slavia Prag við tveimum málum, 27-29.

Tað leikaði javnt á at byrja við og liðini fylgdust upp til 8-8, men so hevði Slavia Prag munin og var á odda við tveimum málum í hálvleikinum.

Í seinna hálvleiki vóru onkra løtu fýra mál á muni, men miðskeiðis í hálvleikinum stóð á jøvnum, bæði 23-23 og 24-24, men ímóti endanum royndist tjekkiska liðið stinnari.

Bestu málskjúttar hjá H71 vóru Jana Mittún við seks málum og Guðrið á Borg við fýra, og Alda av Skarði hevði málinum eitt bjargingarprosent upp á 41.

Seinni dysturin millum H71 og Slavia Prag verður í høllini á Hálsi í kvøld klokkan sjey, og hevur H71 tá møguleikan at venda støðuni, um tað eydnast at vinna við minst trimum málum.