Fýra fólk tikin fyri rúsdrekkakoyring

Á midnátt var ein bilførari í Eysturoynni steðgaður og biðin um at blása í alkoholmátaran. Tann, sum blásti, fór upp um loyvda promilluhámarkið og var koyrdur á Klaksvíkar sjúkrahús at taka blóðroynd.

Tað sama var galdandi fyri tveir bilførarar í Havn. Tann fyrri var tikin kl. 01.30, og tann seinni um 04.30-tíðina í morgun. Báðir vóru koyrdir á Landssjúkrahúsið at taka blóðroynd.

Og í gjáramorgunin um 08-tíðina var ein annar bilførari tikin fyri rúsdrekkakoyring.

Vakthavandi á politistøðini sigur, at tað er óvanligt, at so nógvir bilførarar verða tiknir fyri rúsdrekkakoyring upp á eitt samdøgur.

Ikki so nógv fólk hevur verið í býarlívinum í nátt, men løgreglan hevur hjálpt fleiri fólkum á føtur og eisini hjálpt summum til hús.