Hevur vónir um, at samgonga spyrst burturúr

Javnaðarflokkurin, Tjóðveldi og Framsókn eru farin undir samráðingar um eina nýggja samgongu. 

Fundurin byrjaði fyri einum tíma síðan. 

Frants Jensen fekk orð á samráðingarleiðaran, Aksel V. Johannesen, á veg inn í fundarhølið. Hann heldur góðar møguleikar vera fyri, at hesir tríggir flokkarnir semjast um at skipa samgongu. 

Høgni Hoydal, formaður í Tjóðveldi, sigur, at hann og flokkurin fara til samráðingar við virðing fyri, at Javnaðarflokkurin og Framsókn vunnu valið:

Høgni Hoydal, 16:9

Høgni Hoydal og Tjóðveldi eru nú til samgongusamráðingar. (Mynd: Bjarni Árting Rubeksen)

Hetta er onnur royndin hjá Akseli V. Johannesen, samráðingarleiðara, at skipa samgongu. 

Fyrsta royndin miseydnaðist í gjárkvøldið, tá semja ikki fekst millum flokkarnar um ríkisveitingina. Sum skilst vóru tað Framsókn og Sambandsflokkurin, sum ikki kundu semjast um, hvussu nógv veitingin skal lækka. 

Tjóðveldi, Javnaðarflokkurin og Framsókn vóru í samgongu saman frá 2015 til 2019,  og flokkarnir hava tilsamans 18 sessir í nývalda løgtinginum.