Vápnahvíld er bert lótir

– Russisku álopini har eysturi í Ukraina síðsta samdøgrið vísa, at russiska vápnahvíldin, nú ortodoks jól verða hildin, eru tær beru lótir, sigur Ned Price, talsmaður fyri amerikanska uttanríkisráðið.

Longu hósdagin, tá ið russiski forsetin, Vladimir Putin, kunngjørdi einsíðugu russisku vápnahvíldina, sáddi Ned Price iva um hana.

- Eg haldi fast við mínar metingar og havi ikki broytt meining eftir tað, vit síðani hava sæð, segði hann í gjár.

Norska tíðindastovan, NTB, skrivar, at hóast russisku herdeildirinar skuldu lata jólafriðin ráða, eru tíðindi borin um fleiri álop har eysturi í Ukraina síðani vápnahvíldin skuldi verið komin í gildi.