Janus Rein fer upp í annan flokk í hesum árinum

Enn er ógreitt, um uttanflokkatingmaðurin, Janus Rein, verður partur av samgonguni, ella um hann fer upp í onkran av andstøðuflokkunum. Janus Rein sigur, at hann  ætlar sær upp í ein flokk. Hann vil ikki siga hvønn, men avgerðin verður tikin í hesum árinum.

Janus Rein varð upprunaliga valdur á ting fyri Framsókn, men í oktober í fjør avgjørdi at taka seg úr flokkinum og gerast uttanflokkatinglimur. Nógvar gitingar hava verið um, at Janus Rein ætlar sær upp í Fólkaflokkin, tað er ein av stóru samgonguflokkunum.

Kanningarstjóri

Í gjár segði Janus Rein, at hann fer neyvan at hjálpa andstøðuni at fáa sett ein kanningarstjóra at kanna embætisførsluna hjá løgmanni í tunnilsmálinum. men at tað skal vera tekin um, at hann ætlar sær upp í Fólkaflokkin, vísir hann aftur.

Andstøðan hevur brúk fyri atkvøðuni hjá Janusi Rein, um hon skal kunna krevja ein kanningarstjóra. Grein 38, stykki 2, í stýrisskipanarlógini ásetur, at tveir fimtingar av løgtinginum kunnu krevja kanningarstjóra at kanna, um fyrisitingin hevur útint eitt ávíst mál á lógligan hátt. Tað merkir, at 14 tinglimir skulu atkvøða fyri at seta ein kanningarstjóra. Andstøðan telur 14 tilsamans tingfólk í løtuni. Og tí er atkvøðan hjá Janusi Rein neyðug fyri at fáa kanningarstjóra, um ikki andstøðan skal leita sær inn í samgonguna eftir neyðugu atkvøðuni.

Umrøða møguleikar

Høgni Hoydal, formaður í Tjóðveldi, segði við Kringvarpið í gjár, at andstøðan tosar saman og umrøður møguleikarnar fyri misáliti ella kanningarstjóra. Men lítið samband tykist veramillum andstøðuflokkarnar og Janus Rein, uttanflokkatingmann. 

Meiri verður at frætta í útvarpstíðindunum.