Vísindasiðseminevnd er sett

Heilsumálaráðið boðar frá, at nýggja Vísindasiðseminevndin nú er mannað. Margit Stórá, landsstýriskvinna í Heilsumálum, hevur tilnevnt nýggja Vísindasiðseminevnd.

Tey sjey fólkini í nevndini eru:

Jóhanna Petersen og Jan Rasmussen, sum bæði eru yvirlæknar, og Gunnhild Helmsdal, kommunulækni. Hesi trý eru vald eftir tilmæli frá Læknafelagnum.

Hini fýra eru Sólja í Ólavsstovu, løgfrøðingur, Hilmar Augustinussen, KT-serfrøðingur, Poula Reinert Petersen, sjúkrarøktarfrøðingur, og Kári Purkhús, lívfrøðingur. Hesi fýra hevur landsstýriskvinnan valt. 

Nevndin er vald fyri fýra ár.

Nakrir nevndarliminum sita eitt valskeið afturat, og aðrir eru nývaldir. 

Endamálið hjá Vísindasiðseminevndini er at tryggja, at heilsuvísindaligar granskingarverkætlanir eru skipaðar á vísindasiðsemiligum tryggum grundarlagi. Sum grundregla, skulu rættindi og tryggleiki hjá royndarpersónum takast framum vísindalig og samfelagslig áhugamál í heilsugransking.

Uppgávan hjá Vísindasiðseminevndini er at meta um og geva loyvi til at seta granskingarverkætlanir í verk í Føroyum.