Semingsstovnurin hittir partarnar aftur í dag

Klokkan eitt fara samráðingarfólkini hjá Skipara- og Navigatørfelagnum og Reiðarafelagnum á fund við Semingsstovnin í hølinum hjá stovninum í Havn. 

Eftir at hava roynt í tvey samdøgur var einki grundarlag fyri at gera eitt semingsuppskot, segði Terje Sigurðsson, semingsmaður, fríggjamorgunin.

Semingsstovnurin boðsendi pørtunum at koma aftur í dag, nú teir hava hugsað seg um nakrar dagar.  

Sáttmálin millum Skipara- og Navigatørfelagið og Reiðarafelagið vardi til 1.apríl.

Sáttmálin var longdur til á midnátt mikudagin 10.mai. Hann er ikki longdur aftur.

Men sum vant verður gamli sáttmálin galdandi, so leingi Semingsstovnurin er uppií, og samráðingarnar ikki slitna. 

Samráðingarnar byrjaðu 12.apríl.

3.mai sendi Skipara- og Navigatørfelagið boð eftir Semingsstovninum.