Inflatiónin í Danmark minkar

Sjeynda mánaðin á rað er stórt fall í inflatiónini í Danmark, vísa tøl frá danska hagtalsstovninum.

Í mai vóru brúkaraprísirnir í Danmark 2,9 prosent hægri enn sama mánað í fjør. 

Í apríl var tilsvarandi talið 5,3 prosent hægri.

Tað eru serliga lægri prísir á el og brennievni, sum eru við til at draga prísirnar niður, sigur Kristian Skriver, búskaparfrøðingur í áhugafelagnum, Danskt vinnulív.

Hann leggur aftrat, at brúkararnir nú fáa ágóðan av, at prísirnir á orku, rávøru og flutningi eru falnir munandi, tí tað eisini hevur minkað um framleiðslukostnaðin.

- Hetta setir eina tjúkka striku undir, at teir ringastu mánaðirnir við ógvisligum príshækkingum nú eru av, sigur danski búskaparfrøðingurin sambært tíðindastovuna, Ritzau.