Innskiftari bjargaði U21 eitt stig

Gutti Dahl-Olsen bjargaði føroyska U21-fótbóltslandsliðnum eitt stig, tá hann javnaði til 2-2 í seinna hálvleiki í EM-undankappingardysti ímóti Andorra.

Framherjin úr EB/Streymi kom á vøllin, tá 70 minuttir vóru spældir, og bert fýra minuttir seinni var hann á rætta stað eftir innlegg frá Jørgen Nielsen.

Føroyar løgdu trýst á síðstu løtuna, men tað eydnaðist ikki at fáa sigursmálið í fyrsta dystinum í hesi undankappingini.


B68-framherji byrjaði ballið

Jørgen Nielsen úr B68 legði Føroyar framum frá brotssparksblettinum, tá 13 minuttir vóru spældir. Leiðslan helt kortini ikki leingi, tí bert níggju minuttir seinni javnaði Gerard Sola fyri Andorra.

Tað var javnt í steðginum, men tá 13 minuttir vóru spældir av seinna hálvleiki, var galið hjá heimaliðnum, og Aron Rodrigo legði Andorra framum.

Føroyingarnir trýstu, og Olaf Bárðarson og Jørgen Nielsen misnýttu kjansir, áðrenn Gutti Dahl-Olsen tryggjaði Føroyum fyrsta stigið undir leiðsluni hjá Eyðuni Klakstein, sum óivað hevði ætlað sær øll trý.