Endaðu við góðum avriki

Føroyska flogbóltslandsliðið við kvinnum endaði sína Silver League-luttøku við einum góðum avriki á útivølli ímóti Montenegro.

Montenegro hevði vunnið toppdystin í bólkinum ímóti Portugal nakrar dagar frammanundan, men í fyrsta settið í gjár vóru Føroyar nær við at skelka heimafólki.

Besti føroyski spælarin, Sofía Purkhús Splidt, legði Føroyar framum 23-22 eftir eitt flott comeback miðskeiðis í settinum, men so steðgaði upp, og Montenegro fekk trý stig á rað.

Føroyar fekk eina vánaliga byrjan í 2. setti, men eins og frammanundan komu tær fyri seg aftur miðskeiðis, og munurin minkaði. Montenegro vann settið 25-17, og so var tangin tómur hjá føroysku kvinnunum, sum taptu triðja sett 25-8.

Úrslitið hevði við sær, at Montenegro vann bólkin frammanfyri Portugal, meðan Føroyar endaðu aftast við sama stigatalið sum Georgia.


Montenegro - Føroyar: 3-0 (25-23, 25-17, 25-8)