Peter Schmeichel: "Hans Marius Ziska er eitt stórt tónlistafólk"

Føroyingar kenna nokk best Peter Schmeichel við einum fótbólti í hondunum. 

Heimskendi málverjin, sum í nítiárunum vardi málið fyri bæði enska stórfelagið Manchester United og danska landsliðið, vitjar í Føroyum. 

Peter Schmeichel

Men nú er tað við ljóðførum í hondunum, tí Peter Schmeichel og bólkurin The Ones fara á pallin í sambandi við Tórsfest í annaðkvøld. 

The Ones er mannað við limum úr kenda danska bólkinum Magtens Korridorer. 

Skuldi vera tónleikari

Hóast fólk ikki seta Peter Schmeichel í samband við tónleik, so er tónleikur á ongan hátt fremmandur fyri heimskenda danan. 

"Pápi mín var útlærdur tónleikari frá danska tónlistaháskúlanum, og bæði hann og mamma ætlaðu, at eg skuldi gerast tónleikari," greiddi Peter Schmeichel frá, tá ið hann og Niklas Schneidermann úr The Ones vóru gestir í sendingini Vikuskiftið. 

Peter Schmeichel greiddi eisini frá, at hann er vorðin fjeppari av tónleikinum hjá Mariusi Ziska, og at hann hevur verið og vitjað Hans Marius Ziska í upptøkuhølum hansara í Søldarfirði. 

Hans Marius Ziska, Peter Schmeichel

Sí videobrot úr samrøðuni við Peter Schmeichel í Vikuskiftinum.