Dolly Parton er deyð: "Ein av stóru country-sangskrivarunum farin"

Ein súla á altjóða countrypallinum er fallin.

Dolly Parton er deyð, 80 ára gomul. 

Tað kunngjørdi familjan við einum videobroti á Instagram-vanganum hjá Dolly Patron, sum systursonur Dolly, Bryan Seaver, bar fram. 

 

 

 

 

View this post on Instagram

 

 

 

 

 

 

 

 

 

 

 

A post shared by Dolly Parton (@dollyparton)

Harvið er ein av størstu stjørnunum og bestu sangskrivarunum á altjóða countrypallinum farin um sýn.

Dolly Parton hevur skrivað risahitt sum "I Will Always Love You", ið Whitney Houston hittaði stórt við, "Jolene", "9 to 5" og "Coat Of Many Colors", og tað verður hildið, at hon hevur selt yvir 100 milliónir plátur á sínari yrkisleið. 

Størsta stjørnan av teimum øllum

Ingi Samuelsen, vertur í Jambalaja í útvarpinum, er ikki í iva, hvat vit hava mist við deyða Dolly. 

"Dolly Parton var ein av teimum stóru sangskrivarunum innan countrytónleikin. Hon hevur havt ómetaliga stóran týdning fyri countrytónleikin, og ein fyrimynd fyri sangskrivarar, serliga teir kvinnuligu. Tú møtir neyvan nøkrum kvinnuligum sangskrivara í countryheiminum, sum ikki hevur Dolly sum fyrimynd saman við Loretta Lynn, kanska."

Dolly Parton, Vince Gill

Ein av stóru styrkjunum hjá Dolly Parton var, at hon dugdi sera væl at endurnýggja seg alla tíðina, heldur Jambalaja-verturin. 

"Dolly Parton arbeiddi seg upp frá sera fátæksligum korum, og fór sum blaðung til Nashville at royna seg sum sangskrivari og sangari, og hevur arbeitt seg upp til ta størstu stjørnuna av teimum øllum, sum var á lívi til í dag."

1000 sangir liggja og bíða

Eitt áhugavert er, at Dolly Parton hevur skrivað so nógvar sangir, 3000 verður hildið, og at tað liggja einir túsund, sum enn ikki eru komnir út.

"Skilti eg hana rætt, so hevur hon lagt eina ætlan fyri, hvussu hesir sangirnir - kanska ikki allir 1000 - skulu koma út eftir at hon er farin. So vit fara at hoyra nógv til hana í framtíðini eisini," staðfestir Ingi Samuelsen. 

Dolly Parton var gift við Carl Dean, sum andaðist í fjør, í 1966. Tey bæði fingu eingi børn, men hjálptu til við uppalingini av yngru systkunum hjá Dolly og høvdu tætt samband við børnini hjá teimum. Dolly var gumma kendu songkvinnuna Miley Cyrus.