B36 vann seg víðari við 1-1 javnleiki

B36 vann seg í gjárkvøldið víðari til triðja umfar í Conference League-kappingini, tá ið tað á Cardiff City Stadium eydnaðist at fáa javnleik 1-1 í seinna dystinum ímóti walisiska Haverfordwest.

Av tí at B36 í fyrra dystinum vann 2-1 í Gundadali, gjørdist tað til ein samlaðan 3-2 sigur.

Men B36-fjeppararnir máttu sita rættiliga leingi á pínubonkinum. 

Haverfordwest legði seg framum í 66. minutti, og hetta loypti ein hvøkk á B36-leikararnar, ið høvdu ilt við at finna hvønn annan. 

Tað var ikki fyrr enn í longdu leiktíðini, at tað bragdaði, tá Jann Julin Benjaminsen sera trygt setti eitt brotsspark í netið. 

Í triðja umfari í Conference League-kappingini skal B36 spæla ímóti kroatiska Rijeka, og fyrri dysturin verður á Tórsvølli hóskvøldið í næstu viku.

B36, Conference League

Hetta er ellivtu ferð, at B36 megnar at spæla seg víðari í europeiskum fótbólti.