Gullak Madsen stóreigari í BankNordik

Hósdagin í farnu viku boðaði bankin keypsskálanum frá, at føroyska smápartafelagið, sum eitur "frá 25. september 1978" hjá Gullaki Madsen, nú eigur eina hálva millión partabrøv í 
BankNordik. 

Í prosentum svarar tað til 5,2 prosent av partabrøvunum í bankanum. 

Á keypsskálanum er eisini skrásett, at dagin fyri blivu ein hálv millión partabrøv keypt fyri umleið 76,5 milliónir krónur.

BankNordik, Trygd

Átti 10 prosent frammanundan

Frammanundan átti Gullak Madsen longu fitt av partabrøvum í bankanum. 

3. juli upplýsti bankin nevniliga fyri keypsskálanum, at danska íløgufelagið "Ruth Holding ApS" tá átti umleið 1 millión partabrøv í bankanum. Tað svarar til góð 10 prosent. 

Tá keypti "Ruth Holding ApS" partabrøvini frá danska íløgufelagnum Lind Invest í einum handli, sum hevði eitt virði á 143 milliónir krónur. 

Sostatt hava feløg hjá Gullak Madsen, í summar, keypt partabrøv í Bank Nordik fyri umleið 210 milliónir krónur. 

>>Hoyr Breddan: Nýggjur stóreigari í BankNordik

Eigur góð 16 prosent

Við keypinum eigur hann sostatt - gjøgnum tvey feløg - góð 16 prosent av bankanum. 

Tað ger hann til størsta privata eigara í bankanum, og næststørsta eigaran tilsamans.

Bara Landsstýrið, sum eigur ein triðing av partabrøvunum, er størri.