Endurgjald fyri arbeiðsskaða skal fylgja lønarvøkstri

Endurgjald fyri mist vinnuføri eftir arbeiðsskaða skal fylgja lønarvøkstrinum.

Tí sum nú er, minkar tað í veruleikanum, realvirðið minkar, so hvørt sum lønir fara upp.

Uppskot um at broyta arbeiðsskaðatryggingarlógini kom í løgtingið í gjár.

Dømi í lógaruppskotinum er, at fólk fekk 180.000 kr. í endurgjaldi í 2011.

Endurgjaldið er tíggju ár seinni, í 2022, framvegis 180.000 kr. um árið. Onnur endurgjøld er hækkað sløk 23 prosent.

Tær 180.000 krónurnar skuldu soleiðis verið 221.000 kr. í 2022.

Vóru tær javnaðar sambært einari aðrari grein í arbeiðsskaðatryggingarlógini, var hon 263.535 kr. í 2022. 

Betri Trygging

Landsstýrið sigur, at tað er hugsandi, at feløg, sum selja vanlukkutryggingar, fara at hækka tryggingargjøldini. (Savnsmynd: Bjarni Árting Rubeksen)

Pensjónsaldur hækkar

Lógin skal eisini broytast, tí pensjónsaldurin hækkar.

Í lógini um almannapensjónir er ásett, at pensjónsaldurin er 67 og hálvt ár fyri fólk, sum eru fødd í tíðarskeiðinum 1.juli 1957 til 31 desember 1962.

Hann er 68 ár hjá fólki, sum eru fødd eftir 31.desember 1962.

Hugsandi er, sigur landsstýrið, at tryggingarfeløgini, sum selja vanlukkutryggingar sambært arbeiðsskaðatryggingarlógini, fara at hækka tryggingargjøldini nakað.

Og av tí at kommunurnar hava skyldu til at tekna tryggingar fyri síni starvsfólk, kann talan gerast um eina økta útreiðslu hjá kommununum.

Fyrsta viðgerð verður á tingfundinum 7.september.