U21: Óttast ikki Kroatia

Jørgen Nielsen er glóðheitur undan vitjanini av Kroatia við Djúpumýrar týskvøldið.

Hósdagin skeyt hann ikki færri enn trý mál, tá U21-fótbóltslandsliðið vann 3-2 á Hvítarusslandi.

 - Hann hevði eini tríggjar, fýra støður, sum hann loysti ófatiliga væl, sigur U21-landsliðsvenjarin, Eyðun Klakstein.

 - Hann vísti ordiliga klassan og var ein avgerandi orsøk til, at vit vunnu dystin.


Óttast ikki Kroatar

Sum skilst eru færri enn 100 atgongumerki eftir til EM-undankappingardystin í morgin, og millum annað dyggi stuðulin við Djúpumýrar ger, at føroyingarnir ikki óttast kroatisku vitjanina.

Kortini vænta føroyingarnir ein dyst, sum líkist honum ímóti Hvítarusslandi - bara ímóti einum munandi betri liði.

 - Vit eru her í Klaksvík, vit spæla á okkara undirlagi og i okkara veðurlagi, so vit eru klárir til at stríðast ímóti Kroatia, sum er eitt sterkt lið, og eitt gott avrik kann altíð hava við sær eitt gott úrslit, sigur Eyðun Klakstein.

 - Vit fara sjálvandi at royna at mynda dystin so nógv, sum vit kunnu við okkara spæli og kontraálopum. Vit meta eisini, at vit kunnu spæla upp ímóti teimum við bóltinum, sigur Jørgen Nielsen.