Mæla til at fiska minni av sild og makreli, men meiri av svartkjafti

ICES mælir til, at minni verður fiskað av norðhavssild og makreli, men meiri av svartkjafti næsta ár, skrivar Havstovan.

Millumtjóða havrannsóknarstovnurin hevur gjørt tilmæli um mest loyvdu veiðu eftir uppsjóvarfiski í 2024.

Mælt verður til, at fiskiskapurin eftir norðhavssild minkar 24 prosent, niður í 390.000 tons, og at fiskiskapurin eftir makreli minkar fimm prosent, niður í 740.000 tons.

Hinvegin heldur ICES, at ráðligt er at fiska 12,5 prosent meira av svartkjafti næsta ár, ella tilsamans eina millión og 530.000 tons. 

ICES vísir á, at av tí ósemja hevur verið um býtið av stovnunum av uppsjóvarfiski seinastu árini, hevur fiskiskapurin eftir makreli, svartkjafti og norðhavssild verið millum 30-45 prosent størri, enn vísindaliga ráðgevingin hevur mælt til.

Sí meira um tilmælini frá ICES her.