Navigare Shipping er Ársins Virki 2023

Á ársins Vinnudegi, sum var hildin í Norðurlandahúsinum í gjár, var Navigare Shipping kosið Ársins Virki 2023.

Í grundgevingini hjá dómsnevndini stendur millum annað, at talan er um eina fyritøku, sum byrjaði við at grabba, flyta og selja sand, men hevur við tíðini flutt seg meira yvir í flutningsvinnuna. 

Í dag er fyritøkan vorðin ein av størstu flutningsfyritøkunum í Føroyum, og virkar serliga í vinnuflutningi.

Síðan seinasta ættarliðsskifti í fyritøkuni fyri gott 15 árum síðan, tá ið fýra brøður tóku yvir, hevur fyritøkan meir enn 10 faldað bæði umsetning og starvsfólkatal. 

Í dag eigur fyritøkan 13 skip, og leigar og rekur hartil tvey skip afturat. Fyritøkan hevur umleið 200 stavsfólk, sum dagliga arbeiða á skrivstovum í Føroyum, Norra, Skotlandi og Póllandi, umframt umborð á skipunum, sum sigla runt í størsta partinum av norður Evropa.

Fyritøkan flytur um 2 mió. tons av vørum árliga, og liggur áleið 80 prosent av søluni hjá felagnum í dag uttan fyri Føroyar.