Bannað at lýsa við rúsdrekka á sosialum miðlum

Nú verður bannað at lýsa við rúsdrekka á sosialu miðlunum.

Tað var samtykt í løgtinginum í gjár, tá ein partur av rúsdrekkalógini var fyri. 

Umframt at samtykkja, at bryggjarí nú kunnu selja egnar vørur í sambandi við virkisvitjanir, var eisini broyting samtykt í rúsdrekkalógini um marknaðarførslu.

Frammanundan hevur verið bannað at lýsa við rúsdrekka í sjónvarpi, útvarpi, bløðum og tíðindaportalum, men nú er tað eisini ólógligt at lýsa við rúsdrekka á eitt nú Facebook og Instagram. 

Tað er javnan, at matstovur og skeinkistøð lýsa á hesum talgildu pallum við tilboðum um rúsdrekka. 

Í grein 11 í broyttu rúsdrekkalógini stendur:

Í miðlum, undir hesum eisini talgildum miðlum og øðrum miðlum, sum venda sær til ein skara í Føroyum, er ikki loyvt at lýsa við sølu, skeinking og útflýggjan av rúsdrekka.