- Tíðindi, mentan og ítróttur
TB flutti niður - B36 má dúva upp á HB
![](https://kvf.fo/sites/default/files/styles/grein-ovasta-mynd/public/tb_2.jpg?itok=kpJMz09A)
TB og B36 gjørdust stóru tapararnir í síðsta umfarinum av Betri-deildini, sum var spælt í dag.
TB skuldi vinna á heimavølli ímóti 07 Vestur, um teir skuldu yvirliva í deildini, men tað var útiliðið, sum fekk øll stigini eftir brotssparksmál frá Odduri Petersen í 81. minutti.
B36 hevur leingi ligið á 2. plássið í deildini, men við tapi fyri AB á Argjum, endaðu teir á 4. plássi aftanfyri bæði KÍ, Víking og HB. B36 má nú dúva upp á HB í steypafinaluni, tí vinnur B68 á Tórsøvlli leygardagin, missa teir hvítu evropeiska plássið næsta ár.
Fuglfirðingar gjørdu spádómarnar til skammar
Stóru vinnararnir í 27 umfari gjørdust ÍF, HB og Víkingur.
Tey vóru fá, sum góvu fuglfirðingum stórvegis møguleika at yvirliva undan kappingarárinum. Hesar spádómar gjørdi ÍF til skammar í dag, tá tað eydnaðist at fáa javnleik ímóti B68 í Fløtugerði. Stigið fekk ongan veruligan týdning á degnum, tí TB ikki megnaði at vinna, men fuglfirðingar fegnast ivaleyst um, at teir gjørdu sítt á síðsta leikdegi.
HB var í vanda fyri at koma undir stórt trýst í steypafinaluni ímóti B68, men tað eydnaðist at vinna á EB/Streymi og leypa upp um B36 upp á 3. pláss, sum tryggjar teimum reyðsvørtu evropeiska luttøku næsta ár.
Víkingur kann eisini fegnast um silvurheiðursmerkini. Teir ljósabláu gjørdu ikki mætari enn at vinna á KÍ fyri aðru ferð í ár. Sølvi Vatnhamar skoraði til 2-1 við brotssparki í yvirtíðini. Føroyameistararnir iðra seg sum vera mann, men hava í fyrsta lagi gullveitslu og í øðrum lagi Conference League at hugsa um.