Spennandi poddvarpsrøð um Petur Wigelund

Hvør var maðurin, Petur Wigelund, ið bleiv heiðraður av kongi í 1950, og síðani, 21 ár seinni, eisini bleiv heiðraður av Føroya landsstýri?

Í trimum pørtum sigur Hans Stephansson Egholm søguna um Petur Wigelund, ið vaks upp í Havn fyrst í 1900-talinum, og sum ungur fór til Keypmannahavnar at nema sær kunnleika um báta- og skipasmíð. 

Fyrsti partur verður at hoyra í útvarpinum í dag kl. 17.05, men øll røðin er sum poddvarp her á heimasíðuni hjá KVF, tá ið fyrsti partur verður sendur. 

Petur Wigelund sum barn. Hann bleiv doyptur Petur Danielsen

Hoyr Hans Stephansson Egholm greiða frá um røðina um Petur Wigelund í Góðan morgun Føroyar:

Sonur eitt konubrot

Søgan um Petur Wigelund er eisini søgan um mammu hansara, Christinu Elisabeth Olsen úr Porkeri, sum var eitt satt konubrot.

Hóast mótgang og hjúnarskilnað, so noktaði hon at geva skarvin yvir.

Petur Wigelund

Christina gjørdist sjálvstøðug vinnurekandi, og børnini hjálptu til, har tey kundu, og fóru eisini sum blaðung út forvinna pening til húsarhaldið. Á myndini omanfyri sæst Petur Wigelund sum drongur hjálpa til hjá einum barberi í Havn. 

Tað var í sambandi við hjúnarskilnaðin, at Christina Elisabeth valdi at skifta eftirnavn til Wigelund.

Upprunaliga stavaði Christina eftirnavnið við einkult v, men tað er við tíðini blivið til, at eftirnavnið bleiv stavað við w. 

Petur mundi endað í OL í 1920

Petur Wigelund fór sum kunnugt til Keypmannahavnar at nema sær kunnleika um báta- og skipasmíð.

Hann var fullur av orku og umframt handverkið, so lá tað eisini raðið fyri hjá Peturi Wigelund at íðka nevaleik.

So væl lá fyri, at tað var uppá tal, at Petur skuldi umboða Danmark á Olympisku leikunum í Antwerpen í 1920.

Petur búsettist í Íslandi

Afturkomin til Føroya í 1922 gjørdi Petur Wigelund eina roynd at fáa føroyingar áhugaðar í nevaleiki. 

Steðgurin í Føroyum var tó stuttur, tí í 1926 fluttu til hann til Íslands, og har bleiv hann verandi.

Petur Wigelund, útiseti og slóðbrótari úr Havn

Petur Wigelund bleiv nógv avhildin báta- og skipasmiður í Íslandi.

Tað sigst, at eingin maður er gingin burtur í einum báti, sum Petur Wigelund hevur smíðað. 

Petur Wigelund gjørdist eisini undangongumaður í nevaleiki í Íslandi, har hann giftist íslendskari kvinnu.

Saman fingu tey tvær døtur, og báðar døturnar giftust tónleikarum.

Ein abbasonur bleiv uppkallaður, Pétur Wigelund Kristjánsson. 

Pétur Poppari

Abbasonur Petur Wigelund, Pétur Wigelund Kristjánsson, bleiv kendur tónleikari í Íslandi og var mangar ferðir í Føroyum við sínum íslendsku tónleikabólkum, serliga í sjeytiárunum.

Petur Wigelund, Pétur Wigelund Kristjansson

Føroyingar vistu eisini, at hesin Pétur Wigelund Kristjánsson hevði føroysk ættarbond, tí bløðini gjørdu nógv burtur úr at greiða føroyingum frá hesum. 

Pétur Wigelund Kristjánsson, sum bara varð kallaður Pétur Poppari, var millum annað oddmaður og sangari í fleiri tónleikabólkum, eitt nú Náttúra, Svanfriður, Pelican, Paradís, Poker og Start.

Hvat: Petur Wigelund - útiseti og slóðbrótari úr Havn
Hvar: í útvarpinum og á kvf.fo
Nær: í dag, týsdagin, kl. 17.05