Gekkurin verður týskvøldið

Samhugaverkfallið hjá Starvsfelagnum ger, at Dagur og vika og Gekkurin, sum skuldu vera í sjónvarpinum í kvøld, eru tikin av skránni. 

Men fólk, ið hava glett seg til at spæla gekk um tær 2,4 milliónir krónurnar, vera ikki lumpað, hóast tey mugu brynja seg við eitt sindur av toli. 

Spælt verður um stóru vinningarnar týskvøldið eftir Dag og viku. 

Freistin fyri at keypa gekkaseðlar til dráttin um Mercedes-bilin er tí eisini útsett til týskvøldið klokkan 19, boðar Kringvarpið frá í tíðindaskrivi. 

Allir seldir seðlar til henda dráttin verða við í lutakastinum um Mercedes-bilin. Lutakastið um bilin verður fríggjakvøldið 10. november.