Stjórin í Hondbóltssambandinum sagt upp

Hondbóltssambandið skal hava nýggjan stjóri. 

Eftir umleið eitt ár í starvinum hevur Hans Jón Thomsen sagt seg úr starvi. Hann heldur tó fram til eftir EM-endaspælið hjá hondbóltsmonnunum í Týsklandi í januar.

 - Menningin í føroyskum hondbólti gongur við rúkandi ferð, og havi eg saman við nógvum dugnaligum fólkum roynt at lofta hesari menning skipanarliga og umsitingarliga. Tó, eftir nógv ár í leiðslu, havi eg valt at gera aðrar raðfestingar, og nú felagsskapurin skal taka næstu tøkini, fari eg at geva stafettina víðari, sigur hann sambært Hondbóltssambandinum.

Í umsitingini hjá HSF starvast í dag, umframt stjóran, trý starvsfólk, sum taka sær av umsitingarliga, fíggjarliga, og ítróttarliga partinum í sambandinum.

Hondbóltssambandið er farið undir at leita eftir nýggjum stjóra.