Evropeiskur hondbóltur aftur í Vestmanna

Tað verður trongt í høllini í Vestmanna um vikuskiftið. 

Fyri fyrstu ferð í 25 ár skulu menninir hjá VÍF spæla evropeiskan hondbólt á heimavølli, og ongin ivi er um, at spælararnir gleða seg til at SSV Brixen kemur á vitjan.

 - Tað hava vit ongantíð roynt fyrr. Vit halda, at tað er fantastiskt, at vit hava fingið heimavøll, so vit sleppa at vísa áskoðarunum í Vestmanna evropahondbólt, sigur Andrias Eriksen.


Fingu undantaksloyvi

Høllin í Vestmanna livir ikki upp til krøvini hjá evropeiska hondbóltssambandinum, EHF, men tað eydnaðist vestmenningum at fáa undantaksloyvi til dystirnar.

Vestmenningar spældu seg víðari úr 2. umfari við tveimum teprum sigrum á Esch úr Luksemburg, og VÍF-vongurin metir, at italska mítstøðuliðið um vikuskiftið er eitt vet sterkari.

 - Eg vænti, at tað verður trupult, men á heimavølli trúgvi eg, at alt ber til, sigur Andrias Eriksen.

Seinast VÍF spældi ein evropeiskan dyst á heimavølli var í september í 1998 móti Dicken úr Finnlandi. Tá tapti VÍF báðar dystirnar. Árið fyri, í 1997, spældi VÍF ímóti Dinamo Bukarest úr Rumenia og vann seinna dystin við einum máli, ið varð skorað í síðstu løtu.