Dýrasta umsiting í Fuglafirði

Umsitingin hjá Fuglafjarðar kommunu er tann dýrasta í landinum. Tað vísir ein samanbering av útreiðslunum hjá kommununum, sum Gjaldstovan hevur gjørt.

Umsitingin hjá Fuglafjarðar kommunu kostaði í fjør hvørjum borgara í kommununi 5.276 krónur.

Tvøroyrar kommuna er næstdýrast og kostar 4.732 krónur, og EysturKommuna er triðdýrasta kommunan og kostar hvørjum borgara 4.715 krónur.

Umsitingin í størstu kommununi í landinum, Tórshavnar kommunu, kostaði í fjør 3.456 krónur fyri hvønn borgara, meðan umsitingin í næststørstu kommununi, Klaksvíkar kommunu kostaði 3.152 kr. pr. borgara í kommununi.

Vága kommuna er bíligast við einum eindarkostnaði fyri hvønn borgara í kommununi á einans 2.245 krónur - meir enn helvtina so bílig sum umsitingin í Fuglafjarðar kommunu.

Umboð fyri kommunurnar vóru í farnu viku kunnað um nýggju tølini hjá Gjaldstovuni.

Ætlanin er, at tølini skulu kunna brúkast sum eitt amboð til fíggjarstýring hjá kommununum, tá umræður skúlar, eldrarøkt og annað.