Netanyahu: Gasageirin skal avvápnast

Gasageirin skal avvápnast, tá kríggið við Hamas er av.

Tað segði ísraelski forsætisráðharrin, Benjamin Netanyahu, á tíðindafundi í gjárkvøldið.

Men eingin altjóða samansettur herur skal tryggja hetta, segði forsætisráðharrin. Netanyahu segði, at hann hevur bara álit á, at tað verður ísraelski herurin, sum fær litið hetta upp í hendur.

Benjamin Netanyahu

Netanyahu, forsætisráðharri, hittir ísraelskar hermenn. (Mynd: AFP/Ritzau Scanpix)

Vanlukkulig støða

Boðini frá ísraelsku stjórnini koma, samstundis sum ST-umboð ávara um vanlukkuligu humaniteru støðuna í Gasa. Í løtuni er at kalla ómøguligt at veita neyðhjálp, tí hjálparfólk seta lívið í váða.

Meðan innrásin nú hevur breitt seg til sunnara part av Gasageiranum, hevur Ísrael tveitt flogseðlar yvir Gasageiran við leinki til kort, sum vísa opnar rutur til trygg øki, har palestinar, sum eru riknir heimanífrá, kunnu leita sær.

Gasa, Ísrael og Hamas

Tryggu økini, sum palestinar eru bidnir um at flýggja til, eru als ikki trygg, sigur ST. (Mynd: Reuters/Ritzau Scanpix)

Vánaligt netsamband

Men av tí at netsambandið er so vánaligt, er torført at sleppa fram at hesum kortunum, og  ST-umboð siga, at fleiri av rutunum leiða beint ígjøgnum øki, har skotbardagar eru.

Og fyri at gera ilt verri, eru tryggu økini als ikki trygg, sigur James Elder, talsmaður fyri Unicef við BBC.

Har er einki vatn, eingir hentleikar og eingin verja fyri kulda, sigur hann.