Vilja hjálpa flóttafólkum, sum hava avbjóðingar

Løgmálaráðið biður um 825.000 kr. til eina royndarverkætlan, sum skal geva ukrainskum flóttafólkum eitt fyribyrgjandi psykososialt tilboð og sálarfrøðiliga viðgerð í samstarvi við felagsskapin Beran, sum skal fáa pengarnar, biðið er um.

Hetta verður gjørt eftir tilmæli frá Útlendingastovuni, tí verandi skipan loftar ikki øllum avbjóðingum nóg væl.

Umbønin er útreiðsluneutral, tí biðið verður um, at tær 825.000 krónur vera fluttar av kontuni menningarsamstarv og neyðhjálp.

Eingin kanning

Eingin hevur kannað, hvussu ukrainar í Føroyum trívast, hvussu tey hava tað sálarliga og sosialt, og hvørja hjálp tey fáa, tá tey hava avbjóðingar. 

Men ein kanning í Danmark vísir fyribils, at ein triðingur har hevur avbjóðingar.

Útlendingastovan veit tó frá  Almannaverkinum, Reyða Krossi, Tórshavnar kvøldskúla, skúlum og fólki, sum kenna ukrainar, at nógv teirra stríðast við avbjóðingar so sum sorg, angist, strongd, einsemi, PTSD, trauma og álvarsama sálarsjúku. 

Summi stríðast við alkoholmisnýtslu, og okkurt harðskapsmál hevur verið.