Trý brotsspørk og tvær útvísingar í síðstu Conference League-royndini

KÍ gjørdi ikki færri enn trý brotsspørk, og bæði Jóannes Kalsø Danielsen og Jákup Biskopstø Andreasen vóru vístir av vølli, tá klaksvíkingar taptu 3-0 fyri Lille í síni seinastu roynd í Conference League í ár.

Tey, sum høvdu tikið túrin úr Føroyum til Fraklands, sóu annars ein fyrra hálvleik, har KÍ saktans kundi fingið fleiri mál. Eftir at fyrrverandi Barcelona-verjuspælarin, Samuel Umtiti, rakti stongina, høvdu Árni Frederiksberg, Vegard Forren og Heini Vatnsdal allir fínar málkjansir, men eydnan var ikki við teimum.

Í staðin skoraði Yusuf Yazici fyri heimaliðið, eftir at Odmar Færø gjørdi brotsspark, tá smáir 30 minuttir vóru spældir.


Luftin fór úr bláu ballónini

Um tað er nakað, sum hevur eyðkent KÍ í Evropa í ár, er tað væl skipaða verjuspælið, og tað sá eisini gott út stóran part av dystinum ímóti Lille. Útiliðið stóð væl ímóti franska trýstinum, men síðstu løtuna fór luftin úr KÍ-ballónini.

Tá 86. minuttir vóru spældir gjørdi Jóannes Kalsø Danielsen brotsspark og fekk sítt seinna gula kort, og níggju minuttir seinni gjørdi Jákup Biskopstø Andreasen tað sama, og eins og liðfelagin, var hann sendur av vølli. Angel Gomes og Edon Zhegrova gjørdu sína skyldu úr ellivu metrum, og so endaði tað 3-0 í síðstu Conference League-royndini hjá KÍ á hesum sinni.

KÍ endaði aftast í bólkinum við fýra stigum, meðan Lille vann við 14 stigum. Slovan Bratislava fekk 10 stig og Olimpija Ljubljana endaði á 3. plássi við seks stigum.


Stade Pierre Mauroy (Conference League-bólkaspæl)
Lille - KÍ, 3-0 (1-0)
1-0 Yusuf Yazici, 29 min. (br.)
2-0 Angel Gomes, 87 min. (br.)
3-0 Edon Zhegrova, 90+6 (br.)