Breivik skal aftur í rættin

Í januar fer rætturin í Oslo at viðgera stevningina hjá Anders Behring Breivik, sum 22. juli 2011 framdi yvirgangsatsóknir í Noregi, móti norska statinum.

Breivik sigur, at staturin hevur brotið mannarættindini hjá sær sambandi við fongslingina og umstøðurnar í fongslinum.

Nú hevur rætturin í Oslo avgjørt, at partur av málinum skal vera fyri afturlatnum hurðum, soleiðis at fjølmiðlar ikki sleppa inn. 

Tað snýr seg um eftirlitið í Ringerike-fongslinum, og frágreiðingar hjá trimum leiðarum í fongslinum um umstøðurnar hjá Breivik.

Týsdagin 9. januar skal Breivik eftir ætlan bera fram sína frágreiðing í rættinum. 

Málið verður ført í Ringerike-fongslinum.

Onnur ferðin

Hetta er aðru ferð, at Breivik stevnir norska statinum fyri brot á mannarættindi og vánaligar umstøður í fongslinum.

Hann sigur, at 12 ár í avbyrging eru nóg mikið, og at nú mugu broytingar gerast, so at hann kann samskifta við onnur fólk.

Myndugleikarnir hava víst ákærunum hjá Breivik aftur og siga, at umstøðurnar í fongslinum eru ikki í stríð við mannarættindi.

Andreas Hjetland, embætisfólk hjá norska Ríkisadvokatinum, sigur í skjali til rættin, at Breivik tekur illa ímóti tilboðnum um endurmenning, rehabilitering.

- Havi ilt við at ímynda mær, hvussu nógv fongsli kann slaka, og hvat er ráðiligt, stendur í skjalinum í rættinum.